اسرائیلی اخبارات نے دعویٰ کیا ہے کہ فلسطینی اتھارٹی بیرونی دباؤ کے بعد غزہ کی پٹی کے مریضوں پر عاید کردہ پابندیاں اٹھانے اور مریضوں کو غزہ سے باہر لے جانے کی اجازت دینے پر تیار ہوگئی ہے۔
اسرائیل کے عبرانی اخبار’ہارٹز‘ نے اپنی رپورٹ میں بتایا ہے کہ غزہ کے مریضوں پر فلسطینی اتھارٹی کی طرف سے عاید کردہ سفری پابندیوں پر سخت عالمی رد عمل سامنے آیا تھا جس کے بعد رام اللہ حکومت غزہ کے مریضوں کو دوسرے شہروں میں علاج کے لیے لے جانے کی اجازت دینے پر تیار ہوگئی ہے۔ کل اتوار سے غزہ کے مریضوں کو دوسرے فلسطینی شہروں میں لے جانے کا سلسلہ شروع کیا جائے گا۔
عبرانی اخبار کے مطابق فلسطینی اتھارٹی کی طرف سے غزہ کے مریضوں پر عاید پابندیاں اٹھانے کے حوالے سے فلسطینی اور اسرائیلی انتظامیہ کےدرمیان بھی رابطہ ہوا ہے۔ صہیونی حکومت کی طرف سے فلسطینیوں کے لیے مقرر کردہ رابطہ کار ’بولی مرد خائی‘ اور فلسطینی انتظامیہ کے درمیان رابطہ ہوا ہے۔
اخباری رپورٹ کے مطابق فلسطینی اور اسرائیلی انتظامیہ کے درمیان غزہ کے مریضوں کو دوسرے فلسطینی شہروں کے اسپتالوں میں داخل کرنے کی اجازت پر اتفاق رائے پایا گیا ہے۔ عالمی دباؤ کے بعد فلسطینی اتھارٹی کی وزارت صحت نے غزہ کے مریضوں کو غرب اردن اور دوسرے فلسطینی علاقوں میں قائم اسپتالوں میں داخل کرنے کی اجازت فراہم کی جائے گی۔
خیال رہے کہ فلسطینی اتھارٹی کی جانب سے ایک ہفتہ قبل غزہ کی پٹی کے اسپتالوں میں زیرعلاج مریضوں کو دوسرے فلسطینی شہروں میں قائم اسپتالوں میں داخل کرنے پر پابندی عاید کردی گئی تھی، جس کے نتیجے میں چار بچوں سمیت ایک درجن فلسطینی علاج کی سہولت نہ ملنے کے باعث اسپتالوں میں دم توڑ چکے ہیں۔
