امریکا میں ماہرین نے زیتون کے تیل کےطبی خواص پرایک نئی تحقیق کی ہے جس میں بتایا گیاہے کہ زیتون کا تیل قوت حافظہ کو تقویت دینے کے ساتھ ساتھ دماغی مرض ’الزہائمر‘ سے بچاؤ کا بھی بہترین ذریعہ ہے۔
مرکزاطلاعات فلسطین کے مطابق امریکی تحقیقی مطالعے میں بتایا گیا ہے کہ زیتون کا تیل زہائمر کا موجب بننے والے خلیات ’بیٹا امیلویڈ‘ کو پیدا ہونے سے روکتا ہے۔
امریکا کی ٹیمپل یونیورسٹی کے زیراہتمام کی گئی تحقیق حال ہی میں سائنسی جریدے Annals of Clinical and Translational Neurology میں شائع ہوئی ہے۔
ماہرین نے چوہوں کے دو گروپوں پرزیتون کے تیل کے تجربات کیے۔ ان میں سے چھوٹی عمر کے چوہوں کے ایک گروپ کو زیتون کے تیل میں تیار کردہ خوراک دی جب کہ دوسرے گروپ کو زیتون کے تیل کے علاوہ چیزیں دی گئیں۔
ان چوہوں کی عمر چھ ماہ تھی جب انہیں زیتون کے تیل کی خوراک دینا شروع کی گئی۔ نو سے بارہ ماہ کی عمر تک انہیں یہ خوراک جاری رکھی گئی۔ ماہرین یہ جان کر حیران رہے کہ زیتون کے تیل والی خوراک کھانے والے چوہے دوسرے چوہوں کی نسبت زیادہ ذہین اور سیکھنے کی زیادہ صلاحیت رکھتے ہیں۔
امریکی ماہرین کی ٹیم کے سربراہ ڈومینکو براٹیکو کاکہنا ہے کہ زیتون کے تیل کی خوراک استعمال کرنے والے چوہوں کے دماغ میں ’بیٹا امیلویڈ‘ پروٹین کی مقدار میں بھی کافی کم ہوئی جس سے یہ ثابت ہوتا ہے کہ زیتون کا تیل زہائمر جیسے امراض سے بچاؤ کا بھی موثر ذریعہ ہے۔
