مصری حکومت نے 21 آن لائن ویب سائیٹس تک رسائی معطل کردی ہے۔ مصر میں بندش کا شکار ہونے والے آن لائن ویب قطری پورٹلز میں مشہور ٹی وی چینل الجزیرہ کی ویب سائیٹ سمیت 21 آن لائن خبر گاہیں شامل ہیں۔
مرکزاطلاعات فلسطین ذرائع کے مطابق مصری حکومت کی طرف سے دعویٰ کیا گیا ہے کہ قطری ذرائع ابلاغ اور اخوان المسلمون کے حامی اخبارات پر مصرکے خلاف جھوٹا اور منفی پروپیگنڈہ کرنے کے ساتھ ساتھج دہشت گردی کی حمایت پر مبنی مواد بھی موجود تھا جس پر ان ویب سائیٹس تک رسائی روک دی گئی ہے۔
مصری حکومت کے ایک ذریعے کا کہنا ہے کہ حکومت نے قطری اخبارات کے آن لائن ایڈیشنز اور الجزیرہ ٹی وی کی ویب سائیٹس، ترکی سے شائع ہونے والی اخوان المسلمون کے ٹی وی چینلوں کی ویب سائیٹس کو بلاک کردیا گیا ہے۔
مصری حکومت کا کہنا ہے کہ وہ اخوان المسلمون اور دہشت گردی کی حمایت کرنے والے تمام آن لائن اخبارات کو بہ تدریج بند کردے گی۔ اگلے مرحلے میں اخوان المسلمون کے پروپیگنڈہ ٹی وی چینلوں مکملین اور الشرق کی ویب سائیٹس کو بھی بلاک کیا جا رہا ہے۔
خیال رہے کہ مصری حکومت کی طرف سے قطرکے آن لائن ذرائع ابلاغ کے خلاف کارروائی ایک ایسے وقت میں کی گئی ہے جب دوسری جانب قطر اور بعض خلیجی ممالک اور مصر کےدرمیان تازہ کشیدگی سامنے آئی ہے۔ یہ کشیدگی اس وقت سامنے آئی جب دو روز قبل امیر قطر کی طرف سے اخوان المسلمون، فلسطینی تنظیم حماس اور لبنانی حزب اللہ کے بارے خلیجی ممالک کی پالیسیوں کو تنقید کا نشانہ بناتے ہوئے ایران کی حمایت کا اظہار کیا گیا تھا۔
امیر قطر کے بیان کے بعد سعودی عرب نے قطر کے متعدد ذرائع ابلاغ تک آن لائن رسائی روک دی تھی۔ اس کے بعد متحدہ عرب امارات نے بھی قطری اخبارات اور آن لائن ذرائع ابلاغ بند کردیے ہیں۔
