اسرائیلی زندانوں میں پابند سلاسل دو ہزار سے زاید فلسطینی قیدیوں کی مسلسل بھوک ہڑتال آج 29 ویں روز میں جاری ہے۔ اسیران کا کہنا ہے کہ ’عزت اور آزادی‘ کے عنوان سے جاری خالی پیٹ کی جنگ منطقی انجام تک جاری رکھی جائے گی۔ جب تک بھوک ہڑتالی اسیران کے مطالبات پورے نہیں ہوتے اس وقت تک بھوک ہڑتال جاری رہے گی۔
مرکزاطلاعات فلسطین کے مطابق فلسطینی اسیران کی بھوک ہڑتال میں تازہ پیش رفت یہ سامنے آئی ہے کہ فلسطینی اسیر رہ نما مروان البرغوثی سے ان کے وکیل خضر شقیرات کو الجلمہ جیل میں ملاقات کی۔
اس موقع پر اسیر قائد نے فلسطینی قوم، اسیران اور فلسطینی سیاسی جماعتوں کے نام اپنے متعدد پیغامات بھی بھیجے ہیں۔ انہوں نے فلسطینی سیاسی دھڑوں پر قومی مفاہمت پر زور دیا اور ساتھ ہی فلسطینی اتھارٹی کو خبردار کیاہے کہ وہ صہیونی دشمن کے ساتھ نام نہاد مذاکرات کے جھانسے میں نہ آئے۔
انہوں نے صہیونی انتظامیہ کی طرف سے بھوک ہڑتالی اسیران کے ساتھ برتے جانے والے انتقامی سلوک کی شدید مذمت کی اور کہا کہ اسرائیل اسیران کے ساتھ بھی نسل پرستانہ سلوک کررہا ہے۔
ادھر انسانی حقوق کی مندوبہ فرح بیادسہ نے ’اوھلیکدار‘ جیل میں عوامی محاذ کے اسیر سیکرٹری جنرل احمد سعدات سے ملاقات کی۔ فرح بیادسہ کاکہنا ہے کہ احمد سعدات کو جیل میں قید تنہائی میں ڈالا گیا ہے۔ انہیں ہاتھوں اور پاؤں میں زنجیریں ڈالی گئی ہیں۔
ملاقات کے دوران احمد سعدات نےبھی تمام اسیران اور قوم کے نام اپنے پیغامات میں کہا کہ وہ صبر اور استقامت کا مظاہرہ کرتے ہوئے دشمن کے مظالم کے مقابلے میں اپنے احتجاجی اقدامات جاری رکھیں۔
انسانی حقوق کے مندوبین کا کہنا ہے کہ بھوک ہڑتالی اسیران کو انتقامی کارروائی کا نشانہ بنانے کے لیے انہیں سنگین جرائم کے لیے قائم کردہ سیلوں میں ڈال دیا گیا ہے۔ صہیونی پولیس، فوج اور دیگر تفتیشی ادارے روز مرہ کی بنیاد پر اسیران کے کمروں کی تلاشی لیتے اور اشتعال انگیز حرکات کا ارتکاب کرتے ہیں۔ صہیونی حکام ایک طے شدہ پالیسی کے تحت اسیران کے کمروں کی تلاشی کے ساتھ ساتھ ان سے جارحانہ سلوک کرتے ہیں۔
اسیران کو گندی اور غلیظ گالیاں دی جاتی ہیں اور انہیں سنگین نتائج کی دھمکیوں کا بھی سامنا ہے۔ کئی اسیران کو دیگر قیدیوں سے الگ تھلگ کرکے انہیں قید تنہائی میں ڈال دیا ہے۔
بھوک ہڑتال کے پیچیس روزہ سفرمیں ایک اہم پیش رفت ریڈ کراس کے مندوبین کی ہڑتالی اسیران کے قاید مروان البرغوثی سے ملاقات ہے۔ صہیونی حکام نے وکلاء اور انسانی حقوق کے کارکنوں پر مروان البرغوثی سے ملاقات پر پابندی عاید کر رکھی تھی۔
فلسطین میں عوامی سطح پر اسرائیلی زندانوں میں بھوک ہڑتال کرنے والے اپنے بھائیوں کے ساتھ اظہار یکجہتی کے مظاہروں میں بھی غیرمعمولی اضافہ ہوا ہے۔ اسیران کی حمایت میں سرگرم کمیشن کی طرف سے شہریوں سے آج جمعہ کے روز ملک بھرمیں اسیران کی حمایت میں ریلیوں اور جلسے جلوسوں میں شرکت کی اپیل کی گئی ہے۔ جیلوں کے قریب مساجد میں خصوصی جمعہ کے اجتماعات کا اعلان کیا گیا۔
خیال رہے کہ اسرائیلی جیلوں میں 17 اپریل کو 1500 فلسطینی اسیران نے اجتماعی بھوک ہڑتال شروع کی تھی۔ آج اس بھوک ہڑتال میں مزید سیکڑوں شہری شامل ہوچکے ہیں۔
