مسجد اقصیٰ کے مبلغ شیخ عکرمہ صبری نے مسجد اقصیٰ میں جمعہ کے موقع پر فلسطینی عوام سے بھوک ہڑتالی اسیران کی حمایت میں نکلنے کا کہا اور اسرائیلی حکام سے مطالبہ کیا کہ وہ اسیران کے تمام مطالبات کو مان لیں۔
شیخ عکرمہ صبری نے اس موقع پر اقوام متحدہ کی ذیلی تنظیم یونیسکو کی جانب سے بیت المقدس کو مقبوضہ شہر قرار دینے پر ادارے کے کردار کی تعریف کی اور کہا کہ اس شہر میں کوئی بھی اسرائیلی اقدام اب کوئی حیثیت نہیں رکھتا ہے۔
شیخ عکرمہ صبری نے ایک بار پھر فلسطینی شہریوں کو اپنی زمینیں اور املاک اسرائیلیوں کو بیچنے کے حوالے سے خبردار کیا اور بتایا کہ ایسا کرنے کی صورت میں اسرائیلی مفادات کو فائدہ پہنچے گا۔
مسجد اقصیٰ میں نماز جمعہ کے موقع پر اسرائیلی فوج کے سخت پہرے کے باوجود دسیوں ہزاروں لوگ مقبوضہ بیت المقدس اور قریبی علاقوں سے نماز پڑھنے کے لئے آئے تھے۔
