مصر کے سابق نائب صدر محمد البرادعی نے شکایت کی ہے کہ موجودہ فوجی حکومت نے ان کے پاسپورٹ کی تجدید سے انکار کردیا ہے۔
مرکزاطلاعات فلسطین کے مطابق بین الاقوامی جوہری ایجنسی ’آئی اے ای اے‘ کے سابق سربراہ اور سابق نائب صدر محمد البرادعی نے کہا ہے کہ انہوں نے تین ہفتے قبل وزارت خارجہ کو اپنے پاسپورٹ کی تجدید کی درخواست دی تھی مگر تین ہفتے گذرنے کے باوجود ان کے پاسپورٹ کی تجدید نہیں کی گئی ہے۔
’ٹوئٹر‘ پر پوسٹ ایک بیان میں البرداعی کا کہنا تھا کہ لگتا ہے کہ موجودہ حکومت ان کے خلاف انتقامی سیاست پرمبنی طرز عمل اختیار کیے ہوئے ہے۔ انہوں نے تین ہفتے قبل اپنے پاسپورٹ کی تجدید کی درخواست دی تھی۔ اس میں زیادہ سے زیادہ چند ایام کا وقت درکار تھا مگر ان کے پاسپورٹ کی تجدید نہیں کی گئی ہے۔
ان کا کہنا تھا کہ مجھے امید ہے کہ شہری حقوق اور ریاستی پالیسی میں کوئی گڑبڑ نہیں ہورہی ہے۔
دوسری طرف مصری وزارت خارجہ نے محمد البرادعی کے پاسپورٹ کی تجدید سے متعلق بیان پر کوئی تبصرہ نہیں کیا ہے۔
