اقوام متحدہ میں متعین امریکی سفیرہ نیکی ہالے نے کہا ہے کہ ان کا ملک شام میں جاری خون خرابہ ختم کرانے اور جنگ بندی کا خواہاں ہے۔ بشارالاسد کو اقتدار سے ہٹانےمیں ہمیں کوئی دلچسپی نہیں۔ دوسری جانب شامی اپوزیشن نے امریکی سفیرہ کے موقف کو مسترد کرتے ہوئے بشارالاسد کے شام کے مستقبل میں کسی بھی کردار کو قبول کرنے سے انکار کیا ہے۔
مرکزاطلاعات فلسطین کے مطابق نیویارک میں صحافیوں سے گفتگو کرتے ہوئے امریکی سفیرہ کا کہنا تھا کہ لوگ اپنی مرضی کا معرکہ اختیار کرتے اور اس میں اترتے ہیں۔ جب ہم ایسے کسی معاملے پر نظر ڈالتے ہیں تو ہم دیکھتے ہیں کہ ہمیں اپنی ترجیحات بدلنے کی ضرورت ہے یانہیں۔ ہماری ترجیحات میں بشارالاسد کو اقتدارسے ہٹانا ہرگز نہیں ہے۔
قبل ازیں امریکی وزیرخارجہ ریکس ٹیلرسن نے ایک بیان میں کہا تھا کہ شامی عوام کو فیصلہ کرنا ہے کہ آیا وہ بشارالاسد کا ملک کے مستقبل میں کوئی سیاسی کردار قبول کرتے ہیں یا نہیں۔
