فلسطین کے مقبوضہ بیت المقدس میں اسرائیلی فوج نے ایک فلسطینی نوجوان کو گولیاں مار کر شہید کردیا۔ صہیونی حکام نے دعویٰ کیا ہے کہ شہید فلسطینی کو اس وقت گولیاں ماری گئیں جب اس نے فوجیوں پر چاقو سے حملہ کردیا۔ چاقو کے حملے میں دو اسرائیلی فوجی زخمی ہوگئے۔
مرکزاطلاعات فلسطین کے مطابق اسرائیلی پولیس کی خاتوم ترجمان لوبا السمری نے بدھ کی شام ایک بیان میں بتایا کہ بیت المقدس میں باب العامود کے مقام پر ایک فلسطینی نوجوان نے ملٹری پولیس کے دو اہلکاروں پر چاقو سے پے درپے وار کیے جس کے نتیجے میں دونوں اہلکار زخمی ہوگئے۔
جوابی کارروائی میں فلسطینی نوجوان شدید زخمی ہوگیا۔ اسے بیت المقدس میں ’’ھداسا‘‘ اسپتال منتقل کیا گیا مگر وہ اسپتال پہنچنے کی کچھ دیر بعد زخموں کی تاب نہ لاتے ہوئے دم توڑ گیا۔
اسرائیلی پولیس کے مطابق شہید فلسطینی نوجوان کا تعلق مغرب کنارے کے جنوبی شہر الخلیل سے ہے اور اس کی عمر اکیس سال ہے۔
مرکزاطلاعات فلسطین کے نامہ نگار کے مطابق صہیونی فوج نے فلسطینی نوجوان پر فائرنگ کے بعد علاقہ سیل کردیا تھا۔
فلسطینی وزارت صحت کی جانب سے جاری کردہ بیان میں کہا گیا ہے کہ بیت المقدس میں شاہراہ الواد پر اسرائیلی فوج کی فائرنگ سے ایک فلسطینی نوجوان شدید زخمی ہوگیا۔ زخمی فلسطینی کو اسپتال منتقل کیا گیا ہے جہاں اس کی حالت تشویشناک بیان کی جاتی ہے۔
