ایک سو یہودی آبادکاروں کی جانب سے مسجد اقصی پر چڑھائی

مقبوضہ بیت المقدس سے موصولہ اطلاعات کے مطابق کم سے کم ایک سو یہودی آبادکاروں پر مشتمل ایک جتھے نے گزشتہ روز مسلمانوں کے تیسرے مقدس مقام قبلہ اول مسجد اقصی پر دھاوا بولا۔

خبر رساں ادارے ‘قدس پریس’ کے مطابق اس حملے کے موقع پر یہودی آباد کار گروہ کو اسرائیلی پولیس اور اسپیشل فورسز کا مکمل پروٹوکول اور تحفظ حاصل تھا۔ یہ جتھہ مسلمانوں کے مقدس مقام پر مراکشی دروازے سے باب السلسلہ تک آزادانہ مارچ کرتا رہا۔

قدس پریس کے مطابق نومبر کے مہینے میں ابتک تین یہودی آبادکار مقدس مقام پر اسی نوعیت کے دورے کر چکے ہیں۔ وہ مراکشی دروازے سے مسجد اقصی داخل ہوتے ہیں۔ یہ دروازہ 1967 کی جنگ کے بعد سے اسرائیلی قبضے میں ہے۔