مقبوضہ فلسطین میں مساجد میں اذان دینے پر اسرائیلی ریاست کی طرف سے پابندی عاید کیے جانے کے قانون کی منظوری کے خلاف دنیا بھر میں فلسطینیوں کے ساتھ اظہار یکجہتی کیا جا رہا ہے۔ گذشتہ روز اردن کے صدر مقام عمان میں ایک فٹ بال اسٹیڈیم میں ہزاروں تماشائیوں نے اجتماعی اذان دے کر فلسطینی مساجد میں اذان پر صہیونی پابندی کے خلاف منفرد احتجاج ریکارڈ کرایا۔
مرکزاطلاعات فلسطین کے مطابق گذشتہ روز عمان میں جاری عرب ممالک کی دو فٹ بال ٹیموں کے درمیان میچ کے دوران جب میچ کے چالیس منٹ گذرگئے تو اچانک اسٹیڈیم میں موجود تمام اسپورٹس یونینز کی جانب سے بہ یک زبان اذان کی آواز بلند کردی۔
مقامی سماجی کارکنوں اور کھلاڑیوں سمیت دیگر شہریوں کا کہنا ہے کہ کھیل کے میدان میں اجتماعی اذان دینے کا مقصد صہیونی ریاست کی طرف سے فلسطینی مساجد میں لاؤڈ اسپیکر پر اذان دینے پر پابندی عاید کرنے کے خلاف احتجاج کرنا ہے۔
عینی شاہدین نے بتایا کہ کھیل کے دوران وقفے میں اچانک پورا اسٹیڈیم اللہ اکبر کی آواز گونج اٹھا۔ اسٹیڈیم میں موجود تمام کھلاڑیوں اور تماشائیوں نے مل کر اذان دی۔ اس موقع پر تماشائیوں نے مسجد اقصیٰ کی حمایت اور اسرائیل کے خلاف میں نعرے بھی لگائے۔
