فلسطین کے مقبوضہ مغربی کنارے کے مختلف شہروں اور غزہ کی پٹی میں کل جمعہ اور آج ہفتے کے روز ہونے والے پرامن احتجاجی مظاہروں پر قابض فوج نے طاقت کا وحشیانہ استعمال کیا ہے جس کے نتیجے میں درجنوں فلسطینی زخمی ہوگئے ہیں۔
مرکزاطلاعات فلسطین کے مطابق فلسطین کے مقبوضہ مغربی کنارے کے شہروں رام اللہ، بلعین، نعلین اور قلقیلیہ میں کفر قدوم کے مقامات پر نکالی جانے والی پرامن ریلیوں پر صہیونی فوج نے آنسوگیس کی شیلنگ اور ربڑ کی گولیوں کی بوچھاڑ کے ساتھ ساتھ آتشیں اسلحے سے بھی فائرنگ کی جس کے نتیجے میں درجنوں فلسطینی زخمی ہوگئے۔
ذرائع کے مطابق رام اللہ کے نواحی علاقے نعلی میں یہودی آباد کاری کے خلاف نکالی گئی ایک ریلی پر اسرائیلی فوجیوں نے فائرنگ کی اور آنسوگیس کی شیلنگ کی جس کے نتیجے میں ایک بچے سمیت چار فلسطینی زخمی ہوگئے۔ زخمیوں کو مقامی اسپتالوں میں منتقل کیا گیا ہے جہاں زخمی بچے کی حالت خطرے میں بیان کی جاتی ہے۔
ادھر غزہ کی پٹی میں فلسطینی وزارت صحت کے ترجمان ڈاکٹر اشرف القدرہ نے کہا ہے کہ مشرقی غزہ کی پٹی میں اسرائیلی ریاستی دہشت گردی کے خلاف نکالی جانے والی ایک پرامن ریلی پر اسرائیلی فوج نے فائرنگ کی جس کے نتیجے میں متعدد شہری زخمی ہوگئے۔ ترجمان نے بتایا کہ غزہ کی پٹی میں اسرائیلی فوج کی فائرنگ سے کم سے کم چھ افرا کو گولیاں لگنے سے گہرے زخم آئے ہیں اور انہیں اسپتالوں میں منتقل کیا گیا ہے۔
غرب اردن کے شمالی شہر قلقیلیہ میں عوامی مزاحمتی کمیٹی کے رابطہ کارمراد اشتیوی نے ایک پریس بیان میں بتایا کہ کفر قدوم کے مقام پر نکالی گئی ایک احتجاجی ریلی پر اسرائیلی فوج نے آنسوگیس کی شیلنگ اور ربڑ کی دھاتی گولیوں کا بے دریغ استعمال کیا جس کے نتیجے میں متعدد شہری زخمی ہوگئے۔ انہوں نے بتایا کہ اسرائیلی فوجیوں نے کفر قدوم میں گھر گھر تلاشی کی مہم شروع کی جس کے خلاف عوام سڑکوں پر نکل آئے۔
فلسطینی سماجی کارکن نے بتایا کہ کفر قدوم کے مقام پر اسرائیلی فوج کی فائرنگ اور آنسوگیس کی شیلنگ کے نتیجے میں زخمی ہونے والوں میں ایک اسرائیلی سماجی کارکن بھی شامل ہے۔ اسے موقع پر ہی طبی امداد فراہم کی گئی جس کے بعد اسے گھر بھیج دیا گیا۔
ادھر کفر قدوم میں ایک دوسرے مقام پر فلسطینی شہریوں نے بالفور ڈکلریشن کے ایک سو سال پورے ہونے کی مناسبت سے ایک احتجاجی ریلی نکالی۔ اسرائیلی فوجیوں نے ریلی میں شریک پرامن مظاہرین کو منتشر کرنے کے لیے ان پر وحشیانہ لاٹھی چارج کیا اور آنسوگیس کی شیلن کی۔
بعلین کے مقام پر نکالی گئی ایک احتجاجی ریلی کے دوران بھی متعدد شہریوں کے زخمی ہونے کی اطلاعات ہیں۔ بلعین میں مقامی سماجی کارکن عبداللہ ابو رحمۃ نے بتایا کہ صہیونی فوج نے پرامن ریلی پر آنسوگیس کی شیلنگ کی جس کے نتیجے میں کئی شہری دم گھٹنے سے زخمی ہوگئے۔ بعد ازاں قابض فوج نے عبداللہ ابو رحمۃ کے بھائی احمد ابو رحمہ کو حراست میں لے لیا۔ اس دوران ایک اسرائیلی سماجی کارکن میخا رخمن بھی زخمی ہوا۔
