یہودی آباد کاروں نے فلسطین کے مقبوضہ مغربی کنارے کےشمالی شہرنابلس میں ایک زیرتعمیر مکان کو تیل چھڑک کر آگ لگا دی، جس کے نتیجے میں زیرتعمیر عمارت جل کر خاکستر ہوگئی۔ دوسری جانب کل سوموار کو صہیونی فوج نے غرب اردن اور بیت المقدس میں وحشیانی کریک ڈاؤن کا سلسلہ جاری رکھا جس میں کئی فلسطینیوں کو حراست میں لے لیا گیا ہے۔
مرکزاطلاعات فلسطین کے نامہ نگار کے مراسلے کے مطابق نابلس میں بورین کے مقام پر ایک زیرتعمیر عمارت پر یہودی اشرار نے آتش گیر مواد چھڑکا، جس کے نتیجے میں مکان جل کر خاکستر ہوگیا۔
مقامی فلسطینی شہری دفاع کے حکام کا کہنا ہے کہ انہیں رات 11:53 پر بورین کے مقام پر ایک مکان میں آتش زدگی کی اطلاع ملی۔ امدادی کارکن جائے وقوعہ پر پہنچے تو آگ نے چاروں اطراف سے مکان کو اپنی لپیٹ میں لے لیا تھا۔ آگ پر قابو پانے کے عمل کے دوران زیرتعمیر عمارت کا بیشتر حصہ اور اس میں لکڑی جل کر خاکستر ہو گئی۔
ادھر نابلس میں اسرائیلی فوج نے تلاشی کی کارروائیوں کے دوران العین پناہ گزین کیمپ سے مراسیل الصوالحی نامی شہری کو حراست میں لے لیا۔
اسرائیلی فوجیوں نے نابلس میں عصیرہ اور العین کیمپوں پر چھاپے مارے اور نہتے فلسطینیوں کو زدو کوب کیا۔ گھروں میں تلاشی کی آڑ میں لوٹ مار کی گئی۔
جنین اور الخلیل شہر میں بھی صہیونی فورسز نے گھر گھر تلاشی کی کارروائیوں کے دوران متعدد فلسطینیوں کو حراست میں لے لیا ہے۔
