قابض اسرائیلی فوج نے مشرقی الخلیل میں ایک فلسطینی گھر اور دکان پر دھاوا بول دیا۔
مرکز اطلاعات فلسطین کے رپورٹر کے مطابق اسرائیلی فوج کی ایک بڑی تعداد نے حدور گائوں پر دھاوا بول دیا اور ایک مقامی گھر اور ایک دکان میں داخل ہوگئے۔ قابض فوج نے اس چھاپے کے دوران ایک 19 سالہ نوجوان کو حراست میں لیا۔
دریں اثناء اسرائیلی فوج نے الخلیل کی شہداء سٹریٹ کے داخلی راستوں پر درجنوں افراد کو کئی گھنٹے کے لئے حراست میں لے لیا۔
مقامی کارکن عماد ابو شمسیہ کے مطابق اسرائیلی فوج نے شہداء سٹریٹ اور تل رمیدہ کے مقامی باشندوں کو علاقے میں تین گھنٹوں تک حراست میں لئے رکھا اور انہیں اپنا نام اور فون نمبر رجسٹر کروانے پر مجبور کیا۔
اس کے علاوہ شہر بھر میں کئی عارضی ناکے بھی لگا دئیے گئے تھے۔ اسرائیل کی جانب سے پابندیوں کا یہ سلسلہ الخلیل کے شہریوں پر دبائو ڈالنے کا ایک حربہ ہے۔ اسرائیلی حکام الخلیل سے ہونے والے مزاحمتی کارروائیوں پر خوفزدہ ہیں اور اپنے اس خوف کا اظہار مزید پابندیاں لگا کر کر رہے ہیں۔
