فلسطین کے مقبوضہ مغربی کنارے کے شہروں میں سیکیورٹی کی ذمہ داریاں ادا کرنے والی فلسطینی اتھارٹی کی پولیس کی طرف سے صہیونی فوج کے ساتھ باہمی سیکیورٹی تعاون کا سلسلہ جاری ہے۔ عباس ملیشیا نے گذشتہ روز فلسطینی شہروں میں گھسنے والی دو اسرائیلی خواتین فوجی اہلکاروں کی مہمان نوازی کے بعد انہیں پورے عزت واحترام کے ساتھ واپس ان کے کیمپوں میں پہنچا دیا۔
عبرانی اخبار’’یدیعوت احرونوت‘‘ نے اپنی رپورٹ میں بتایا ہے کہ بدھ کے روز دو خواتین اہلکار غرب اردن کے شہر طولکرم میں فلسطینی اتھارٹی کے زیرکنٹرول علاقے میں غلطی سے داخل ہوگئی تھیں۔ فلسطینی فورسز نے انہیں کچھ دیر اپنے ایک مرکز میں منتقل کر دیا تھا۔ جہاں ان کی بھرپور خاطر تواضع کی گئی۔ بعد ازاں انہیں سیکیورٹی میں واپس ان کے کیمپوں تک پہنچا دیا۔
عبرانی اخبار نے ’راستہ بھول کر‘ غرب اردن میں داخل ہونے والی دونوں ملٹری پولیس اہلکاروں کی تصاویر بھی جاری کی ہیں جنہیں فلسطینی ملیشیا نے باعزت ان کے کیمپوں تک پہنچا دیا۔
عبرانی اخبار کے مطابق دونوں اہلکاروں کی گاڑی میں لگے ریڈیو سسٹم میں تعطل پیدا ہونے کے باعث بیت لید چوک سے وہ راستہ بھول گئی تھیں۔
