اسرائیلی جیلوں میں قید فلسطینی انتظامیہ اور فوج کی طرف سے ڈھائے جانے والے مظالم کے خلاف تنگ آمد بہ جنگ آمد کے مصداق سخت احتجاج پر مجبور ہیں۔ گذشتہ روز فلسطینی اسیران نے صحرائی جیل ’’نفحہ‘‘ کے وارڈ نمبر 1 میں آگ لگا دی جس کے نتیجے میں ایک کمرہ جل کرخاکستر ہو گیا۔
فلسطینی امور اسیران کے شعبہ اطلاعات کے ڈائریکٹر عبدالرحمان شدید نے میڈیا کو بتایا کہ بدھ کے روز فلسطینی اسیران نے ’’نفحہ‘‘ جیل میں آگ لگا دی جس کے نتیجے میں ایک کمرہ جل گیا۔ آتش زدگی کے باعث صہیونی حکام کا رکھا گیا سامان بھی جل گیا ہے۔
فلسطینی عہدیدار کا کہنا تھا کہ اسیران کی طرف سے یہ انتہائی اقدام اس وقت اٹھایا گیا جب قابض فوج نے رات گئے اسیران کو ان کے کمروں سے نکالا اور انہیں عریاں کر کے تلاشی لینے کا مکروہ حربہ استعمال کیا گیا۔ اس موقع پرمسلح صہیونی فوجیوں نے فلسطینی قیدیوں کو سرعام تشدد کا بھی نشانہ بنایا۔
عبدالرحمان شدید نے کہا کہ فلسطینی قیدیوں نے عریاں تفتیش کے رد عمل میں بہ طور احتجاج نفحہ جیل کے کمرہ 4 کو آگ لگا دی تھی، جس کے نتیجے میں کمرہ جل کر راکھ ہو گیا تھا۔
شدید نے بتایا کہ نفحہ جیل میں قید فلسطینیوں کو آئے روز اسرائیلی فوج کے اچانک چھاپوں اور تشدد جیسے مکروہ حربوں کا سامنا ہے جس پر قیدی بار بار احتجاج کر چکے ہیں۔
