اسرائیلی وزیراعظم بنجمن نیتن یاھو نے فلسطین کے مقبوضہ مغربی کنارے کے جنوبی شہر الخلیل میں فلسطینیوں کے خلاف انتقامی پالیسی کے تحت یہودی آباد کاروں کے لیے مزید 42 مکان تعمیر کرنے کی منظوری دی ہے۔
اسرائیل کے عبرانی ٹی وی 2 نے اپنی رپورٹ میں بتایا ہے کہ وزیراعظم نے وزیر دفاع آوی گیڈور لائبرمین اور دیگر ارکان کابینہ کے مشورے سے الخلیل شہر میں قائم ’کریات اربع‘ کالونی میں یہودی آباد کاروں کے لیے 42 گھروں کی تعمیر کی منظوری دے دی ہے۔
الخلیل میں یہودی آباد کاروں کے لیے مکانوں کی تعمیر کی منظوری سے قبل اسرائیلی وزیراعظم نیتن یاھو اور وزیر دفاع آوی گیڈور لائبرمین نے شہر میں فلسطینی مزاحمت کاروں کے حملے میں ہلاک ہونے والی ایک یہودی خاتون کے اہل خانہ سے ملاقات کی۔ ریڈیو رپورٹ میں بتایا گیا ہے کہ مقتولہ کے اہل خانہ نے وزیراعظم سے مطالبہ کیا کہ وہ فلسطینیوں کی مزاحمتی کارروائیوں کے جواب میں غرب اردن میں یہودی توسیع پسندی کے نئے منصوبوں کی منظوری دیں۔
