فلسطین وزارت داخلہ نے بتایا ہے کہ مصری حکام کی طرف سے انہیں رفح گذرگاہ کے کھولے جانے کی اطلاع دی گئی ہے اور بتایا گیا ہے کہ کل بدھ سے رفح گذرگاہ اگلے پانچ دن تک دو طرفہ آمد ورفت کے لیے کھلی رہے گی۔
غزہ وزارت داخلہ کے ترجمان ایاد البزم نے مرکزاطلاعات فلسطین کو بتایا کہ مصر کی طرف سے ہمیں باضابطہ طورپر مطلع کیا گیا ہے کہ رفح گذرگاہ اگلے پانچ دن کھلی رکھی جائے گی۔ ترجمان نے بتایا کہ مصر کی طرف سے اطلاع دی گئی ہے کہ رفح گذرگاہ 29 جو بروز بدھ کھولی جائے گی اور چار جولائی سوموار تک کھلی رہے گی۔ اس کے بعد جمعہ تک معمول کی تعطیلات کے دوران رفح گذرگاہ کو بند کردیا جائے گا۔
مصری حکام کا کہنا ہے کہ پہلے سے تیارکردہ فہرست کے مطابق مسافروں کو سرحد عبور کرنے کی اجازت ہو گی۔
خیال رہے کہ رواں ماہ کے دوران مصر نے صرف چار روز کے لیے رفح گذرگاہ کھولی تھی، جس کے نتیجے میں 30 ہزار شہریوں میں سے صرف 3142 فلسطینیوں کو سفر کی اجازت دی گئی تھی۔
رواں سال میں اب تک 168 ایام میں صرف 10 دن رفح گذرگاہ کھولی گئی ہے۔ گذشتہ برس رفح گذرگاہ 344 دن مسلسل بند رہی ہے۔
