اسرائیل کے دارالحکومت اور شمالی فلسطین کے شہر تل ابیب میں اسرائیلی پولیس نے ایک فلسطینی شہری کو حراست میں لیا ہے۔ جس پرالزام عاید کیا ہے کہ اس نے ایک فوجی اہلکار پر چاقو سے حملہ کیا، جس کے نتیجے میں فوجی شدید زخمی ہو گیا۔
عبرانی نیوز ویب پورٹل 0404 نے اپنی رپورٹ میں بتایا کہ سوموار کی شام ایک فلسطینی نوجوان نے اسرائیلی فوجی اہلکار پر چاقو سے وارکیے، جس کے نتیجے میں وہ زخمی ہو گیا۔ پولیس نے فرار ہوتے فلسطینی حملہ آور کو گرفتار کر لیا ہے جسے تفتیش کے لیے خفیہ مقام پر منتقل کر دیا گیا ہے۔
ادھر اسرائیلی پولیس کی جانب سے جاری کردہ ایک دوسرے بیان میں بتایا گیا ہے کہ حملہ آور فلسطینی نوجوان کی عمر 17 سال ہے۔
عبرانی اخبار’معاریف‘ کے مطابق چاقو سے حملے کا واقعہ قومی نوعیت کے جھگڑے یا ذاتی رنجش کا شاخسانہ بھی ہو سکتا ہے۔
خیال رہے کہ پچھلے برس اکتوبر کے بعد سے فلسطین میں جاری تحریک انتفاضہ کے دوران فلسطینیوں کی انفرادی مزاحمتی کارروائیوں میں 34 صہیونی ہلاک اور 500 سے زاید زخمی ہو چکے ہیں۔
