فلسطین کے مقبوضہ مغربی کنارے کے مختلف شہروں میں سوموار کے روز اسرائیلی فوج کی جانب سے گھر گھر تلاشی کی مہمات کے دوران کم سے کم 15 فلسطینی شہریوں کو حراست میں لینے کے بعد خفیہ حراستی مراکز منتقل کردیا گیاہے۔
مرکزاطلاعات فلسطین کے مطابق کلب برائے اسیران کی جانب سے 23 مئی کو جاری کردہ ایک بیان میں بتایا گیا ہے کہ آج علی الصباح بیت المقدس اور غرب اردن میں تلاشی کی مہمات کے دوران کم سے کم پندرہ فلسطینیوں کو حراست میں لے لیا گیا۔ بیان میں بتایا گیاہے کہ بیت المقدس میں گھر گھر تلاشی کی مہمات کے دوران عیسویہ قصبے سے احمد ابو الحمص، آدم محمود، مجد مصطفیٰ قیس درباس اور قصیٰ علیان کو گرفتار کیا گیا۔
غرب اردن کے شمالی شہر طولکرم میں گھر گھر تلاشی کی کارروائیوں میں تین فلسطینی شہریوں مراد فتحی موسیٰ، عماد مرعی شحادہ اور عدی محمد صالح کو گرفتار کیا گیا۔ جنین سے بھی تین فلسطینی شہری بہاء فائز حمدان، قصی حسن خلیلیہ اور مہدی عروق کو اردن سے واپسی پرگرفتار کیا گیا۔
رام اللہ میں تلاشی کی کارروائیوں میں دو فلسطینیوں ابراہیم سلامہ العاروری اورحمد ھانی خضور، نابلس سے عزالدین تیسیر عبدالحق اور بیت لحم سے مالک صالح القاضی کو گرفتار کرنے کے بعد حراستی مراکز میں ڈال دیا گیا ہے۔
بیت لحم میں مرا رباح کے مقام پر ابراہیم سمیح ثوابتہ کی گرفتاری کے لیے چھاپہ مارا گیا مگر گھر پرنہ ہونے کے باعث ان کی گرفتاری عمل میں نہیں لائی جاسکی ہے۔ قابض فوج نے اسے خود کوحکام کے حوالے کرنے کے نوٹس جاری کیے ہیں۔
