مصری وزیر خارجہ سامح شکری نے اقوام متحدہ کے سیکریٹری جنرل بان کی مون کی جانب سے رفح گزرگاہ کو مستقل طور پر کھولنے کے مطالبے کو مسترد کردیا ہے۔
نیویارک میں ایک پریس کانفرنس میں بات کرتے ہوئے شکری نے بتایا ہے کہ "اسرائیل غزہ میں امداد اور کمرشل سامان کے داخلے کا مرکزی ذمہ دار ہے۔ مصر صرف اسی صورت میں رفح گزرگاہ کو کھولے گا جب امداد کی اشد ضرورت ہوگی۔”
اقوام متحدہ کے سیکریٹری جنرل بان کی مون نے اسرائیل اور مصر پر زور دیا تھا کہ وہ غزہ میں سامان اور افراد کی نقل وحرکت پر عاید پابندیاں ختم کردیں۔
مصری حکام نے رواں ہفتے 84 دنوں کے بعد بدھ اور جمعرات کے روز رفح کراسنگ کو کھولنے کا اعلان کیا تھا۔
غزہ حکام کے مطابق 30 ہزار سے زائد لوگوں کی جن میں 9500 مریض اور 2700 طلباء شامل ہیں، رجسٹریشن ہوئی ہے اور وہ مصر سے سفر کرنے کے انتظار میں بیٹھے ہوئے ہیں۔
