ترکی کی حکومت کی جانب سے فلسطین کے علاقے غزہ کی پٹی کے محصورین اور حالیہ اسرائیلی جارحیت میں زخمی ہونے والے شہریوں کے علاج معالجے کے لیے طبی امداد سے بھرا ایک ٹرک تحفے میں پیش کیا ہے۔
مرکزاطلاعات فلسطین کے مطابق انقرہ حکومت کی جانب سے ’’اطباء ۔ ارض ترکی‘‘ کی فلسطین کے علاقے غزہ کی پٹی میں قائم برانچ کو طبی سامان پر مشتمل ایک ٹرک پہنچایا گیا ہے۔ طبی سامان میں ادویات اور دیگر اشیاء شامل ہیں۔ یہ امدادی سامان غزہ کی پٹی میں جنگ سے متاثرہ شہریوں میں تقسیم کیا جائے گا۔
ترکی کی تعاون و کورآرڈینیشن ایجنسی’’تیکا‘‘ کے رابطہ کار نے خبر رساں ایجنسی اناطولیہ سے بات کرتے ہوئے بتایا کہ امدادی ادارے’’اطباء ارض ترکی‘‘ کو فراہم کیے ایک امدادی سامان کے ٹرک میں ادویات اور دیگر سامان شامل ہے۔ یہ سامان غزہ کی پٹی میں جنگ سے متاثرہ شہریوں میں تقسیم کیا جائے گا۔ انہوں نے بتایا کہ جلد ہی امدادی سامان کا ٹرک اور ایک ایمبولینس غزہ کی پٹی کے لیے روانہ کر دی جائے گی۔
ترکی کی جانب سے غزہ کی پٹی کو طبی امداد ایک ایسے وقت میں دی گئی ہے جب غزہ وزارت صحت نے کہا ہے کہ علاقے کی ناکہ بندی کے باعث اسپتالوں میں ادویات کی شدید قلت پائی جا رہی ہے۔ وزارت صحت کی جانب سے جاری کردہ ایک بیان میں کہا گیا ہے کہ اسرائیلی پابندیوں کے باعث غزہ میں بنیادی ضرورت کی 140 اقسام کی ادویہ ناپید ہیں۔
