اسرائیل کا اغوا شدہ فلسطینیوں کے خلاف نیا قانون

غزہ کی پٹی میں وزارت اسیران نے کہا ہے کہ اسرائیل ان دوسو فلسطینیوں کے خلاف لڑائی کے غیرقانونی شریک کا قانون لاگو کرنا چاہتا ہے جن کو غزہ پر مسلط برہنہ جارحیت کے دوران گرفتار کیا گیا اور ان کے کوائف اور تفصیلات کے بدلے میں ابھی تک کسی بھی قسم کی اطلاعات فراہم نہیں کی گئی ہیں- 

 اطلاعات کے ڈائریکٹر ریاض الاشقر نے کہاہے کہ اسرائیل لڑائی کے غیر قانونی شریک کے قانون کا اس لئے استعمال کرنا چاہتاہے تا کہ شہریوں کے اغوا کا سلسلہ جاری رکھ سکے اور ان کے خلاف کسی قسم کی قانونی چارہ جوئی بھی نہ ہوسکے- انہوں نے مزید کہاکہ اس خودساختہ قانون کے ذریعے، قابض اسرائیلی انتظامیہ کی کوشش ہے کہ گرفتار شدگان کو اپنے دفاع کے حق سے بھی محروم رکھاجائے اور ان پر جو فرد جرم عائد کی جارہی ہو اس کو بھی خفیہ رکھاجا سکے-

ریاض الاشقر نے کہا کہ جنگ سے پہلے قابض اسرائیلی انتظامیہ نے ایک خصوصی عدالتی ادارہ تشکیل دیاتھا اور اس کا مقصد یہ تھاکہ ان فلسطینیوں کے خلاف الزامات عائد کئے جاسکیں، جنہیں غزہ اور جنوبی لبنان میں جنگ کے دوران گرفتار کیاگیاتھا اور انہیں ’’لڑائی کے غیر قانونی شریک ‘‘ قرار دے کر انہیں طویل عرصے تک قید میں رکھاجائے- انہوں نے کہاکہ چار ماہ قبل قابض اسرائیلی فوجی عدالتوں نے چار فلسطینی قیدیوں ریاض ایاز، خالد سعید،فرید الوسرایہ اور نصرایاز کو ’’لڑائی کے غیر قانونی شریک ‘‘ قرار دیا تھا-

الاشقر نے انسانی حقوق کی عالمی تنظیموں خصوصاً ریڈکراس سے اپیل کی تھی کہ انسانی ہمدردی کی بناء پر فراہم کی جانے والی سرگرمیوں کو غزہ کی پٹی میں مزید توسیع دیں اور گرفتار شدگان کی رہائی کے لئے کام کریں- ’’محاصرہ ختم کرانے کے لئے فلسطینیوں کی عالمی مہم ‘‘نے خبردار کیا ہے کہ غزہ کی پٹی میں عمومی معاشرتی حالات دگرگوں ہورہے ہیں، انہوں نے کہاکہ وہاں موجود فلسطینی اسرائیلی جارحیت اور اسرائیلی ناکہ بندی کے اثرات کا نشانہ بن رہے ہیں-

بیان میں مزید کہا گیا ہے کہ اسرائیل نے ابھی تک غزہ کی پٹی میں کئی اہم ضروریات مثلاً ایندھن، کھانا پکانے کے لئے گیس اور تعمیراتی سازو سامان کی ترسیل پر پابندی عائد کررکھی ہے- بیان میں کہاگیاہے کہ غزہ کی پٹی انسانی حقوق کے عالمگیر منشور اور انسانی حقوق کے حوالے سے ہونے والے تمام معاہدوں کی خلاف ورزی ہے-  علاوہ ازیں سوموار کے روز ایک اور فلسطینی حسن حلائقہ شہید ہوگیا ، وہ اختلاج قلب کا مریض تھا اور اسرائیلی حصار کی وجہ سے علاج کے لئے غزہ سے باہر نہ جاسکا-

غزہ کی پٹی پر محاصرے کے نتیجے میں شہید ہونے والے مریضوں کی تعداد 275ہوچکی ہے اور اس تعداد میں مسلسل اضافہ ہونے کاامکان ہے کیونکہ سینکڑوں مریض انتہائی نگہداشت وارڈوں میں تکلیف دہ حالات کا سامنا کررہے ہیں- انہیں علاج کے لئے غزہ سے باہر جانے کی اجازت نہیں دی جاتی- وزارت صحت کے افسر تعلقات عامہ ہمام نسمان نے عالمی برادری سے اپیل کی ہے کہ اسرائیل پر دباؤ ڈالا جائے کہ وہ راہداریاں کھول دے نیز طبی ادویات اور میڈیکل سامان کو غزہ کی پٹی میں آنے دے –