اسرائیل کےعبوری وزیر اعظم ایہود اولمرٹ نے سرکاری ملازمتوں میں عرب اسرائیلوں کے خلاف نسلی امتیاز کی شکایات کی تفتیش کے لئے بنائے گئےایک پارلیمانی کمیشن کے سامنے پیش ہوئے۔
کمیشن کے سربراہ اور اسرائیلی پارلیمان کےعرب رکن احمد تبی نے بتایا کہ ایہود اولمرٹ نے کمیشن کے سامنے اعتراف کیا کہ قیام اسرائیل کے وقت سے یہاں رہنے والے عرب شہریوں نے "ناقابل برداشت” نسلی امتیاز کا سامنہ کیا ہے۔ ایہود اولمرٹ کے اس بیان کی کسی آزاد ذریعے سے تصدیق نہیں ہو سکی۔
مسٹر تبی نے کہا کہ عرب اسرائیلی شہری کل آبادی کا بیس فیصد ہیں جنکہ سول سروس میں ان کے لئے صرف پانچ فیصد کوٹہ ہے۔ انہوں نے کہا کہ مرکزی بینک کے نو سو ملازمین میں ایک بھی عرب اسرائیلی شہری نہیں ہے۔ تبی نے مطالبہ کیا کہ نسلی امتیاز کی پالیسی کا خاتمہ ہونا چاہیئے۔
قیام اسرائیل کے وقت اپنے گھروں کو نہ چھوڑنے والے عربوں کی تعداد ڈیڑھ لاکھ سے بڑھ کر اب 1.3 میلین ہو گئی ہے۔ سنہ دو ہزار چھے میں اسرائیلی سپریم کورٹ نے عرب شہریوں کے ساتھ امتیازی سلوک کی مذمت کی تھی۔
