عرب ممالک فلسطین کے داخلی انتشار کے خاتمے کے لیے تعاون کریں: مصر

مصر نے فلسطین میں داخلی استحکام کے قیام اور انتشار کے خاتمے کے حوالے سے حماس اور فتح کے درمیان جاری مصالحانہ کوششوں کو مؤثر بنانے کے لیے عرب ممالک سے تعاون کا مطالبہ کیا ہے-
 
مصری اعلی سطحی عہدیدار نے اپنے ایک بیان میں مطالبہ کیا کہ حماس اور فتح کے درمیان مصالحت کے لیے تمام عرب ممالک اپنا کردار ادا کریں- اس وقت فلسطین کی دونوں نمائندہ جماعتوں کو قریب لانے کا ایک سنہری موقع ہے اگر یہ ہاتھ نکل گیا تو فلسطین کے داخلی حالات مزید خراب ہوسکتے ہیں-
 
واضح رہے کہ حماس اور فتح کے درمیان مصالحت کے لیے عرب ممالک کی کئی بااثر شخصیات قاھرہ پہنچ رہی ہیں جہاں رواں ماہ کی پچیس تاریخ کو حماس فتح مذاکرات کو مؤثر اور نتیجہ خیز بنانے کی کوشش کریں گی- قاھرہ پہنچنے والی شخصیات کے نام ظاہر نہیں کیے گئے، تاہم ذرائع کا کہنا ہے کہ یہ شخصیات حماس اور فتح کے درمیان حائل اختلافات کی خلیج ختم کرنے میں اہم کردار ادا کرسکتی ہیں-