اسرائیل نے دھمکی دی ہے کہ وہ مستقبل میں لبنان کے ساتھ کسی ممکنہ جنگ کے دوران اُن لبنانی دیہات کوتباہ وبرباد کردے گا جہاں سے حزب اللہ اسرائیلی شہروں پر راکٹ فائر کرے گی۔
اسرائیلی فوج کی شمالی ڈویژن کے سربراہ جنرل گادی ایزنکوٹ نے ایک انٹرویو میں کہا کہ2006 میں بیروت کے علاقے ضاحیہ کوارٹرز میں جو کچھ ہوا تھا وہی لبنان کے ان تمام دیہات میں دہرایا جائے گا جہاں سے اسرائیل پرراکٹ فائر کئے جائیں گے۔ ضاحیہ لبنانی تنظیم حزب اللہ کا مضبوط گڑھ تھا جسے دوسال پہلے34 روزہ جنگ کے دوران اسرائیل نے مسلسل فضائی حملے کر کے تباہ کردیا تھا۔جنگ میں تقریباً12 سو لبنانی شہری جاں بحق اور 159 اسرائیلی فوجی ہلاک ہوگئے تھے۔
جنرل گادی ایزنکوٹ کا کہنا ہے کہ اسرائیلی فوج لبنانی دیہات پر بھرپورطاقت کااستعمال کرے گی اور بڑے پیمانے پر تباہی اور بربادی لائے گی کیونکہ اسرائیلی نکتہ نظر سے وہ سویلین دیہات نہیں بلکہ فوجی اڈے ہیں۔
