ایرانی جنرل مسعود جزائری نے متنبہ کیاہے کہ اگر ایران پر حملہ کیا گیا تو اس سے عالمی جنگ چھڑ جائے گی، لامحدود امریکی حرص اور عالمی صیہونیت نے دنیا کو تباہی کے دہانے پر لاکھڑا کیاہے۔
یہ بات انہوں نے سرکاری خبر رساں ایجنسی کو گفتگو میں بتائی۔ڈپٹی چیف آف اسٹاف بریگیڈیئر جنرل مسعود جزائری نے کہا کہ اگر ایران کے خلاف جارحیت کی گئی تو اس سے عالمی جنگ شروع ہوجائے گی۔انہوں نے افغانستان اور عراق کا حوالہ دیتے ہوئے کہا کہ لامحدود امریکی حرص اور عالمی صیہونیت نے دنیا کو تباہی کے دہانے پر لاکھڑا کیاہے۔
ادھر ایران کے نائب فوجی کمانڈر عبدالرحیم موساوی نے فارس نیوز ایجنسی کو بتایا کہ ہم اپنے کچھ ہتھیارمنظر عام پر لائے ہیں لیکن کچھ اہم چیزیں ابھی تک خفیہ رکھی گئی ہیں جو وقت(حملہ) آنے پر ظاہر کی جائیں گی۔واضح رہے کہ ایران کے جوہری پروگرام کے حوالے سے ایران امریکہ کے مابین سخت محاذآرائی پائی جاتی ہے،عالمی برادری کی جانب سے پابندیوں کی دھمکی کے باوجود ایران نے یورینیم کی افزودگی جاری رکھی ہوئی ہے۔
