اسرائیل کے داخلی سلامتی سے متعلق ادارے نے ممکنہ جنگ کی صورت میں کیمیائی اثرات سے بچنے اور جانی نقصان کا حجم کم سے کم کرنے کے لیے حکومتی اداروں کے اہلکاروں کو جنگی تربیت دینے کا فیصلہ کیا ہے- اسرائیلی اخبار ’’معاریف‘‘ کی رپورٹ کے مطابق حکومت کو خطرہ ہے کہ ایران یا حزب اللہ کی جانب سے اسرائیلی آبادیوں میں کیمیائی ہتھیار استعمال کیے جاسکتے ہیں- اس ضمن میں داخلہ سیکورٹی کے ذمہ دار ادارے نے شہریوں کو زہریلی گیس سے بچائو کے لیے ’’گیس ماسک‘‘ فراہم کرنے کا بھی اعلان کیا ہے- رپورٹ کے مطابق جنگی تربیت کا سلسلہ آئندہ منگل سے شروع ہوگا جس میں تمام وزراء، مشیروں اور تمام حکومتی اہلکاروں اور سیاسی قائدین کو جنگ کے دوران خود کو بچانے کے مختلف تکنیکی طریقے بتائے جائیں گے- تجزیہ کاروں کا خیال ہے کہ اسرائیل کی جانب سے عوامی تحفظ کا یہ اقدام 2006ء کی اسرائیل لبنان جنگ کے بعد حکومت پر کی جانے والی تنقید کے تناظر میں کیا گیا ہے- حکومت کی جانب سے اس طرح کے اقدام سے خطے میں کسی جنگ کے امکانات بھی دکھائی دیتے ہیں-
