حماس کے خلاف جنگ اسرائیلی مفاد میں نہیں، مذاکرات کیے جائیں

اٹلی نے کہا ہے کہ اسلامی تحریک مزاحمت (حماس) کے خلاف جنگ کسی طور بھی اسرائیل کے مفاد میں نہیں- اسرائیلی بقاء اور سلامتی حماس سے مذاکرات میں ہے-
 ان خیالات کا اظہار اٹالین وزیر خارجہ ماسیموڈالیما نے اٹلی کے ٹیلی ویژن ’’سکائی‘‘ کو دیئے گئے انٹرویو میں کیا- انہوں نے کہا کہ حماس فلسطین میں عوام کی ایک مقبول جماعت ہے، اسے کسی صورت بھی نظر انداز نہیں کیا جاسکتا- حماس کے خلاف جنگ کا مطلب قیام امن کی منزل سے مزید دوری ہوگی-
 واضح رہے کہ ایک ہفتے کے دوران اٹالین وزیر کا یہ دوسری مرتبہ اسرائیل سے مذاکرات کا مطالبہ ہے- دریں اثناء اٹلی میں اسرائیلی سفیر غدعون مائر نے ڈالیما کے بیان پر شدید ردعمل کا اظہار کرتے ہوئے حماس سے مذاکرات کا امکان مسترد کردیا- اٹلی میں ایک پریس کانفرنس میں انہوں نے کہا کہ حماس سے موجودہ حالت میں مذاکرات کا مطلب اسرائیلی وجود سے دستبرداری کے مترادف ہوگا- ایک ایسی جماعت جو اسرائیل کے وجود کے خلاف ہو اس سے مذاکرات کیوں کر ہو سکتے ہیں-