اسرائیل کی حمایت صہیونی ریاست کو تسلیم کرنے کے مترادف ہے

پاکستان کی دینی اور مذہبی جماعتوں نے پاکستان کی جانب سے اقوام متحدہ میں اسرائیلی قرارداد کی حمایت کرنے پر شدید غم و غصے کا اظہار کرتے ہوئے حکمرانوں پر واضح کیا کہ اسرائیل کو تسلیم کرنے کی کوشش کی گئی تو اس پر شدید مزاحمت کی جائے گی –
ان جماعتوں نے کہا حکومت پاکستان کی جانب سے اقوام متحدہ کے اقدام سے مسلمانوں کے جذبات مجروح ہوئے ہیں- قومی موقف سے انحراف کا خدشہ ہے ان خیالات کا اظہارجماعت اسلامی پاکستان کے جنرل سیکرٹری سید منورحسن نے اپنے ردعمل میں کیا – انہوں نے کہا کہ اقوام متحدہ میں دیگر ممالک کو نظر انداز کر کے پاکستان کی جانب سے اسرائیلی قرارداد کی حمایت سے صہیونی قوتوں کی حوصلہ افزائی ہوئی ہے – فلسطین میں اسرائیلی فوج آگ اور خون کہ ہولی کھیل رہی ہے –
 ان حالات میں پاکستان کی جانب سے اسرائیلی قرار داد کی حمایت فلسطینی بھائیوں کے زخموں پر نمک چھڑکنے کے مترادف ہے – انہوں نے کہا کہ اسرائیل کو کسی صورت میں تسلیم نہیں کیا جائے گا -سید منورحسن نے کہا کہ ہم اسرائیل کے حوالے سے حکومت کے اس نرم رویے کے خلاف اپنے احتجاج کو بڑھائیں گے