مصر رفح راہداری کے معاملے پر ٹھوس مؤقف اختیار کرے: حماس

غزہ میں حماس حکومت کے قائم مقام سپیکر ڈاکٹر احمد بحر نے مصر کی جانب سے ہر ممکن تعاون کی پالیسی کو سراہتے ہوئے مطالبہ کیا ہے کہ قاہرہ رفح راہداری کے معاملے میں بھی ٹھوس مؤقف اختیار کرے- ڈاکٹر بحر نے مصری صدر حسنی مبارک کے نام ایک خط میں لکھا ہے کہ برادر ملک مصر نے غزہ کے مفلوک الحال باشندوں کے لیے تاریخی تعاون کیا-
انہوں نے غزہ کے عازمین حج کے مصر سے حجاز مقدس جانے کی اجازت دینے پر بھی ان کا شکریہ ادا کیا- قائم مقام سپیکر نے مزید کہا کہ رفح کراسنگ غزہ سے عرب دنیا اور عالمی برادری سے رابطے کا واحد راستہ ہے- اس کی بندش سے اہل غزہ مزید مشکلات کا شکار ہو جائیں گے- انہوں نے مصری صدر کو اسرائیل کی مسلط کردہ معاشی ناکہ بندی کے باعث ہونے والی اموات سے بھی آگاہ کیا-
 ڈاکٹر بحر نے مسئلہ فلسطین کے حل کے لیے مصر کی کوششوں کی بھی تعریف کی اور دیگر عرب ممالک سے مل کر اسرائیلی ناکہ بندی ختم کرانے کے لیے کوششیں بھی مزید تیز کرنے کا مطالبہ کیا-