فلسطینی نونہال ناکہ بندی سے موت کے منہ میں جارہے ہیں، اسرائیل ذمہ دار ہے

غزہ میں اسرائیل کی مسلط کردہ معاشی ناکہ بندی کے مخالف قومی محاذ نے غزہ میں ایک بچے کی شہادت کا ذمہ دار اسرائیل کو قرار دیا ہے- معاشی ناکہ بندی محاذ کے سربراہ ڈاکٹر جمال خضری نے غزہ میں ایک پریس کانفرنس کے دوران کہا کہ اقتصادی ناکہ بندی سے غزہ میں موت کے سائے چھائے ہوئے ہیں- ہسپتالوں میں ایمرجنسی ہے اور ادویات کی شدید قلت کے باعث مریضوں کی حالت تشویشناک حدتک خراب ہے-
 انہوں نے کہا کہ حال ہی میں نو سالہ بچے کو دوائی نہ ملنے سے فوت ہونے کے بعد بھی اسرائیل نے شہریوں کو سہولیات فراہم نہیں کیں- خضری نے مزید کہا کہ معاشی ناکہ بندی کے مسلط کے نفاذ کے بعد سے اب تک تیرہ افراد موت کے منہ میں جاچکے ہیں- انہوں نے خبردار کیا کہ اگر حالات اس قدر کشیدہ رہے تو مزید فلسطینی نونہال موت کے منہ میں جاسکتے ہیں-