فتح کے حملے میں ترقی پسند جمہوری پارٹی کے چالیس کارکن زخمی

غرب اردن میں بیرزیت یونیورسٹی کے احاطے میں منعقدہ فلسطینی ترقی پسند جمہوری پارٹی کے جلسے پر الفتح کے شرپسندوں کے حملے میں چالیس افراد زخمی ہوگئے- عینی شاہدین کے مطابق فتح کے یوتھ ونگ کے کئی درجن اہلکار لوہے اور لکڑی کے ڈنڈوں سے مسلح ہو کر جلسے کے شرکاء پر حملہ آور ہوگئے- فتح کے حملہ آوروں نے لاٹھی چارج کے علاوہ جلسے کے شرکاء پر پتھراؤ بھی کیا، جس کے نتیجے میں جلسے میں شریک ایک بڑی تعداد زخمی ہوگئی-
 فتح کے حملے کے بعد جلسہ کی کارروائی یونیورسٹی حال میں شروع کی گئی لیکن شرپسند عناصر نے وہاں بھی دوبارہ حملہ کر کے شرکاء کو زدوکوب کیا- عینی شاہدین کا کہنا ہے کہ فتح کے یوتھ ونگ اور طلبہ کے ظالمانہ حملے کی ماضی میں مثال نہیں ملتی- جلسے میں شریک معمر افراد کو پکڑ پکڑ کر تشدد کا نشانہ بنایا گیا- دوسری جانب ہسپتال ذرائع کے مطابق رام اللہ کے ہسپتالوں میں لائے جانے والے زخمیوں کی تعداد چالیس بتائی گئی ہے جبکہ کئی افراد کی حالت نازک ہے-