فلسطینی اتھارٹی کے وزراعظم اسماعیل ھنیہ نے سعودی عرب کے ولی عہد سلطان بن عبدالعزیز سے ٹیلی فون پر بات چیت کرتے ہوئے کہاہے کہ وہ فلسطینی اتھارٹی کے سربراہ محمود عباس سے تمام امور پر بلاشبہ بات چیت کے لئے تیار ہیں-
اسماعیل ھنیہ کے دفتر سے جاری شدہ پریس ریلیز میں کہاگیاہے کہ فلسطینی وزیراعظم کے اس اقدام کا مقصد یہ ہے کہ فلسطینی علاقے بگڑتی ہوئی صورت حال کو بہتر بنایا جائے اور مسئلہ فلسطین کو ختم کرنے کے لئے اسرائیل جو سازشیں کررہاہے اس کا حل تلاش کیا جائے- اسماعیل ھنیہ نے شہزادہ سلطان کو ٹیلی فون پر رمضان المبارک کی آمد پر مبارک باد بھی دی- اسماعیل ھنیہ نے کہاکہ فلسطین میں جو کچھ ہوا اسے ’’بھائیوں کے اختلاف ‘‘کے مترادف سمجھنا چاہیے انہوں نے کہا کہ وہ مکہ معاہدے کی روشنی میں کسی قسم کے معاہدے کے لئے تیار ہیں- انہوں نے اپنی حکومت کی جانب سے کہا کہ مکہ معاہدہ ہی افہام و تفہیم کی بہتر بنیاد بن سکتاہے-
شہزادہ سلطان نے اسماعل ھنیہ کے موقف کی حمایت کی اور کہا کہ وہ یہ پیغام شاہ عبداللہ بن عبدالعزیز کو پہنچادیں گے- انہوں نے یہ بھی وعدہ کیا کہ فلسطینی لوگوں پر عائد اقتصادی ناکہ بندی کے خاتمے کے لئے بھی وہ اقدام کریں گے- فتح کے ایک عہدیدار نے کہاکہ محمود عباس اسماعیل ھنیہ کے درمیان ملاقات کا کوئی امکان نہیں ہے-
