غزہ میں نگراں حکومت کے داخلی سیکورٹی امور کے انچارج اور رکن قانون ساز کونسل اسماعیل اشقر نے غرب اردن کی سلام فیاض حکومت پر غزہ میں انارکی پھیلانے کا الزام عائد کیا ہے- غزہ میں ایک اخبار نویسوں سے بات چیت کرتے ہوئے انہوں نے کہا کہ صدر محمود عباس کی جماعت الفتح حماس حکومت کے خلاف مسلسل سازشوں کا ارتکاب کررہی ہے- غرب اردن میں امریکی ساختہ ’’ڈائیٹون پلان‘‘ کے نفاذ اور اسلامی تحریک مزاحمت (حماس) کا دائرہ تنگ کرنے کی کوششیں کی جارہی ہیں-
اشقر نے کہا کہ ان کے پاس ایسے ٹھوس شواہد موجود ہیں جن سے فتح اور سلام فیاض حکومت میں شامل وزراء کے غزہ میں بدامنی کو ہوا دینے کی سازشوں کو بے نقاب کیا گیا ہے- انہوں نے واضح کیا کہ سلام فیاض حکومت اخلاقی انسانی اور قانونی ہر پہلو سے ناکام ہو چکی ہے اور اپنی ناکامی پر پردہ ڈالنے کے لیے غزہ کے شہریوں کے خلاف سازشیں کررہی ہے-
انہوں نے غزہ میں تخریب کاری کے فروغ کے لیے کی جانے والی کوششوں کو ناکام بنانے کے عزم کا اظہار کیا کہ فتح کی سرگرمیاں جمہوریت پسندی پر حملہ ہیں- غزہ میں فتح کی اسرائیل حمایت میں بدامنی کی کوششوں کو بھی ناکام بنادیا جائے گا
