غرب اردن میں عباس ملیشیا کے حماس اراکین پر ایک ہزار حملے

  فلسطین کے شہر غرب اردن میں سلام فیاض کی غیر آئینی حکومت نے اسلامی تحریک مزاحمت (حماس) کے خلاف کریک ڈاؤن کی سینکڑوں کارروائیوں کا انکشاف کیا گیا ہے- حال ہی میں حماس کی جانب سے جاری کردہ عباس ملیشیا کے حملوں کی تفصیلات بیان کی گئی ہیں- رپورٹ کے مطابق 11 جون سے 31 اگست تک 80 ایام میں صدر عباس کے زیر کمانڈ ملیشیا نے حماس اراکین پر ایک ہزار سات حملے کیے- ان حملوں میں 639 اغواء اور گرفتاریوں کے ہیں جبکہ 36 مرتبہ بلااشتعال فائرنگ کے واقعات رونما ہوئے- حماس کے زیر کنٹرول خیراتی اداروں پر 175 حملے کیے گئے جبکہ حماس سے ہمدردی رکھنے والے شہریوں کی املاک پر 136 حملے کیے گئے- 25 مرتبہ حماس میڈیا سیل کو نشانہ بنایا گیا- جبکہ حماس سے تعلق رکھنے والے اراکین اسمبلی پر 34حملے کیے گئے- حماس کے زیر کنٹرول مساجد پر حملوں کی تعداد 163 ہے- رپورٹ کے مطابق گزشتہ اڑھائی ماہ کے عرصے میں غرب اردن میں حماس کے خلاف بدترین کریک ڈاؤن میں مقامی ذرائع ابلاغ نے بھی مکمل خاموشی اختیار کی- اس دوران خود ذرائع ابلاغ کو بھی عباس حکومت کے دباؤ کا سامنا تھا اور حماس کے خلاف کارروائیوں کی کوریج اور رپورٹنگ کرنے والے صحافیوں کو دھمکیاں دی جارہی تھیں-